2013》》》》2014

2013快將完結了，究竟呢年我做過d咩呢？記性愈來愈差好多野都唔記得，希望新一年一切愈來愈好，正能量增加，怨氣減少，願能幫助更加多既人，生活更積極不要再虛渡光陰！

良師難求

囡囡學校尋日開聖誕party，多數同學仔都帶薯片，菠蘿腸仔，雞亦之類！我平日朝朝一早已經要煮飯，所以我一於偷下懶買（現成）零食啦！

d小朋友平時對學校食物部d小食都好有興趣架，但不是每個都有零用錢可以買野食，於是細心既班主任就在這天買給每位同學仔一包魚蛋，一包燒賣，一包腸仔，一於大大滿足你地食餐飽！

除此之外，她還預備了禮物給同學仔抽獎，先抽號碼再由同學仔自己揀心水禮物，佢竟然細心到25個同學但有30份禮物，因為佢要最後一個同學抽禮物時仍然有選擇權揀禮物喎，真係愛c你呀⋯⋯Miss Lau! 

仲有約半年就畢業了，我好唔捨得佢呀！老師係咪唔可以收禮物架，除了thank you 卡，我可以做d咩表達我對佢既感激呢？

好驚

囡囡成日想食田鷄焗飯，其實我好怕買同洗田鷄架，不過做咗人地阿媽就好多野都要頂硬上！

今晚佢又要求食田鷄了，我又驚又怯地去買同洗了！點解我咁驚都肯為佢煮？因為上星期考試，已出了成績，今次d卷好難，平時A的同學全部跌哂去C呀（好在囡囡仲可以保住個B），最重要的英文少了15分，數學亦比預期少11分呀，不過我冇怪佢或者話佢！因為佢放學打俾我已同我講佢好唔開心，在學校時仲喊了一場，我仲點夠膽再話佢吖，佢話幾個老師都已經在堂上鬧了佢地一大餐喎，不能想像幾個小朋友在課室大喊既情形究竟老師有咩感覺呢？

我唯有安慰囡囡幸好上次考得不錯，平均拉勻應該OK既，而且失手都不足為奇吖，冇理由長勝將軍次次高分永不失手既！希望佢地EQ高d睇得開d啦，雖然暗地𥚃我都擔心及緊張既！

呢輪我成日好早就眼瞓個人十分累，大約晚上十點已在飯廳睡著了，但心想累都正常吖，朝早6點3成身，晚上10點都應該累啦！不過唸唸下個女都6點8起身啦，但好多時做功課都要做到十點幾十一點喎，難道佢又唔累咩？

所以話説回來我唯一可以做的是煲佢愛飲既湯，煮佢愛食既食物俾佢，不過我真係好驚d田鷄架！

雲霧

呢幾日我地又開始要考試了！

唸中學又唸到頭都大之際，突然覺得自己又沒特別鍾意一間（唯獨希望有宗教背景較好），既然幾間都OK不如隨緣啦，天父自有安排，可能咁樣仲好啦！

 

「其實明天是如何，你們還不知。你們的生命是甚麼呢？你們原來是一片雲霧，出現片刻就不見了。」（雅各書四章十四節）

心赤赤

尋日同學校一齊放學後參觀中學，點解揀星期四吖，活動完都成六點了，功課都未做星期五又要中默，攪到成十一點半先有得瞓！

囡囡六點幾起身忙到放學已筋疲力盡了，仲鬼咁多功課，佢一路流哂眼水打哂喊路咁望住d功課發呆呀！到瞓覺時就一路流眼淚話點解自己做得咁慢咁冇用，做媽媽既真係心都赤埋呀！

日日唔食得唔瞓得只是做做做，究竟為咩呢？

點揀至啱佢呢？

呢個月我既活動都係周圍睇中學，要開始幫囡囡唸中學了！究竟邊間適合佢呢？要活動開心既？抑或入讀大學機會高既？女校？男女校？

唉！仲慘過係我去讀，好大責任呀！仲辛苦過揀老公呀！help))))))

爭取？進取？

愈來愈對現今社會唔適應，究竟我係適應力強定超弱呢？

囡囡學校仍在考試中，昨天剛考完英文，阿女通常回來都祇會略略提下內容便算，不會好似其它同學咁乜都回家滙報，所以我今早都只是聽其它家長d對話，不過充滿埋怨嚕騷聲音！例如：時間太短了，45分鐘做11版紙，究竟做唔做到架呢？之前既quiz太深太少人合格要投訴喎，d家長話學校係咪想害死佢地d學生，今次呈分試了，出到咁深成績拉低哂點出去見中學呀？佢地又問過英文老師原來今次係校長要求出咁深，班家長打算一齊去見校長去嘈佢去質問佢，仲話要唱衰間學校喎！

我自己唸究竟間間學校內部都係咁麻煩，抑或我咁唔好彩入正呢間！如果其它學校都要咁深咁短時間做咁多張紙咁都要跟大圍架啦，深定淺在乎識唔識，識就淺，唔識就1+1都係深，我唸得唔啱嗎？係我性格被迫屈服慣吖？抑或我太軟弱既性格？不慣事事出來嘈出來爭取，唔慣現今社會既~常常要遊行發聲示威抗議呢？唔識講呀亦唔識點教女了！

不吐不快

人越大發現越難與人相處，一有利益衝突便現哂形了，本以為自己不同人斤斤計較便冇事，但當發覺人地可能當你儍婆時便心心不忿了！最憎人闊佬自己吝嗇他人，你當佢朋友佢當你儍人，我唔係唔知架，唔係唔記得你答應過既野，而係唔想相信你係咁既人啫！

一切安好

最近一切安好，祇是頸肩酸痛了一星期，希望快d好番！

近期很喜歡看「最佳女主角」，集集都鍾意睇，每個女人都好叻，看看她人的優點及做人態度，令我學到野！昨天的葉玉卿訪問中啓發我的～～想食的要即刻食，想做的想講的要立即做，go~ go ~go~！

可能不嬲我做人都不夠任性事事都太克制了（除了發脾氣），希望之後自己能放d盡情d，令自己鬆d身邊的人都會舒服d！

惡夢

每日不停的功課、默書、擔任服務，十月尾又考呈分試了，又要開始考慮㨂邊間中學！一大一小都滿是壓力，心情總是沉甸甸的，最近甩很多頭髮，加上每晚的惡夢，有點兒吃不消了！

中秋節2013

19~9~2013
雖然今日係中秋節但亦是Daddy的死忌，心中感覺怪怪的，但亦要學習活在當下，忘記不快！知道媽咪今日一定唔開心，所以一早去陪佢飮茶行街抒下悶氣，之後再回家湊女放學！呢兩晚我都瞓得麻麻地，睡夢中都有Daddy既出現！

唔唸咁多啦，祝大家中秋節快樂！

十六年前既今日

今日係我同老公既結婚週年呀，不經不覺十六年了，不長也絕對不短的日子，直至尋晚我都忍口唔提佢，好在今朝一早佢已問我記唔記得今日咩日子喎，即係佢記得啦！

今晚我地在家打邊爐慶祝，佢放工買咗三隻大蟹及兩大個日本水蜜桃回來，全部都係我愛吃的，不需什麼名貴禮物，佢記得今日加上咁有我心買我愛既食物已好心甜了，希望我地未來既日子會更好更開心更愛對方！

貼身膏藥

9~9~2013（mon)舊同事嫁女請我飲，要安頓好一大一細才可獨自出街，於是等老公放工接手湊女才可出發，當然一早要阿女做哂功課先得啦！其實都算早開席了，8點半已開始食，心血來潮9點半望下個手機，阿女留咗兩次what's app 話已經冲涼瞓覺了，安心了！突然阿女來電了，傳來飮泣聲，話好掛住我喎@@, 又會咁癡身既！快極都十點幾先散席啦，不斷的what's app 我，佢一直唔訓等到我十一點半呀，陰公，今朝一早烏烏下咁去返學呀！冇唸過佢會突然間

咁掛住我喎！

大菇

話說之前在某商場購物到某個金額可加$10換一盒有機「菇」返屋企種，囡囡好想試下種，於是就換一盒回家試下玩！呢排收成期了，呢隻黃金菇大d超快呀，個樣仲幾靚仔添，囡囡好開心呀，一早一晚變化已經好大好有滿足感呀！

收成啦~

絕對係好煩既煩惱絲

我對於自己既髮型通常好快就會睇佢唔順眼，因為又薄又少，冇咩髮型可揀！不過都要攪得似樣d架，今日一於染一染色等佢粗糙d厚少少，遲d先電下髮啦，真係好怕喺髮型屋坐幾粒鐘呀！好羨慕阿女d頭髮呀，又黑又有光澤又夠多，佢既煩惱竟然係太厚太多喎，真係吹脹呀！

夠嚇

今日阿女自己一個搭Van仔返學呀，夠哂鐘又落雨見有車咪上囉，得一個位咪俾阿女自己上車囉，不過原來張八達通冇錢呀，佢又不嬲都唔帶$返學，擔心c我啦，叫佢返到校打俾我，點知佢打咗一次俾我，但我miss call了，之後我再打返俾佢，已經關機了，真係自己帶佢好過！

放學問返佢今朝點，佢話好彩俾佢搵到個$5咋（車費其實只需$3.5），今晚拿拿聲放d$喺佢書包，筆袋，銀包仔先得，我呢個阿媽真係少d心血都俾你嚇c呀！

I am not alone ~

我好似唔知自己做緊咩咁呀, 周圍亂咁按鈕, 有時得有時唔得, 咁TRY法都幾累呀, 不過試試下又幾刺激既, 因為好多blog友一齊試吖嘛! I am not alone!

NO.1)))))))))))))))))))))))))))

好唔容易先寫到呢篇網誌, 真係萬事起頭難呀, 不過好在有班好BLOG友, 呢度問下o個度又問下, 摸摸下來試, 希望快d上手揾番d熟朋友啦!

捨不得妳飛

之前還在暗暗的開心囡囡開始大個女, 可以自己搭車去街開始獨立, 但今日............................
學校開始今日返學了, 囡囡要求自己返學放學了, 畢竟佢陪了我兩個多月既暑假(24小時一齊), 佢突然唔需要我, 好唔慣好失落好掛住佢呀!

本來我一直既計劃係佢讀中學之後我便返出來搵PART-time做了, 莫非而家計劃可以提早????

小B大任務

                   

17-8-2013 （sat)
今日囡囡要返學校做學長陪訓課程，分兩部份12：30-2pm&2-4pm, 咁即係12：30-4pm啦！佢話想試下自己返學喎，雖然已經十歲女，不過我冇返工平日就當然管接管送做跟班啦，既然佢咁講都要慢慢試下放手了，叫佢帶電話差足電，到學校打俾我，放學又打俾我啦！雖然我有靜雞雞跟住佢，不過佢行得太快了，眨下眼就唔見咗佢，過多一陣來電已到校門口了，又會咁快㗎！好啦咁我可以free到四點了，老公竟然call我搵佢食Lunch，好啦橫掂有足夠時間！

食完午餐打算行下街先回家，突然電話響了，囡囡話第二部分取銷了而家放學了，大件事了我趕唔切返去架噃！冷靜d，問問阿女八達通有冇$？另外銀包仔有冇現金呀？八達通應該有$既，叫佢先去搭小巴去地鐵站再行天橋到對面，然後去巴士站搭xx號巴士在邊個站落車（之前我帶佢搭過，希望佢記得啦），我會在巴士站接佢，假若電話冇電打唔到俾我，就一定要在巴士站等我，無論如何唔好走開！其實都好擔心架，話哂第一次嘛，佢又細細粒！好在一切順利，開頭佢見到我仲好開心既，突然又好激動想喊了，我當然立即讚下佢又錫下佢啦，今次好成功呀！

Proud of you
    ^O^

兩件值得記住既開心事

                   

今年既生日好開心一個好BLOG友竟然記得仲知道我邊日生日, 收到佢既祝福好開心好開心, 所以有時D野係講心唔講金架, SWEET SWEET~當然仲有好多其它有心blog友既祝福啦, thanks all!

另外, 因為我病所以成日都好累, 但囡囡又想整蛋糕俾我喎, 於是佢自己上網搵食譜, 買哂材料之後便一手一腳在廚房開工, 我一D都冇參與呀, 最後係好成功地炮製咗一個合桃牛油蛋糕送俾我呀, 真係好感動好開心呀~

不過另一件令我耿耿於懷既事係~~之前同大家講過既o個位老朋友竟然連一句祝福既說話都冇send俾我, 完全失哂蹤, 究竟點解會咁架? 完完全全的心淡了~

開心最重要

                

今年報既暑期活動雖然唔多, 不過兩樣囡囡都玩得好開心呀, 游水已學了5堂, 佢讚呢間泳會冇呃鐘~個半小時都游得好開心!
另外羽毛球亦學得好開心, 兩小時都唔夠皮, 而我就帶本書去睇陪住佢學, 我唔係直昇機母親要吼住佢, 不過坐喺裡面有冷氣嘆嘛, 所以我會坐在角落頭睇書唔望亞女費事影響佢地(當然有偷偷地望啦), 不過呢位亞sir真係教得唔錯, 連熱身都做得好認真咁教, 落堂前又安排10分鐘既遊戲時間俾佢地, 抵讚!

有時覺得自己雖然傻傻下咩都唔識又咩都唔知, 不過好在都有少少運仔, 呢個羽毛球活動係同學仔個媽咪話我聽架, 報完名仲要抽籤中咗先可以參加, 咁咪即管試下囉, 點知原來咁"正"既

 

, 又平又好, $300有10堂, 每堂仲兩小時, 仲要係羽毛球總會d人教喎，去邊度搵可以咁平咁正喎, 係咪抵讚吖!

快樂老人

有d人天生既正能量好似特別強及多既！

老爺同奶奶都是充實正能量既人，每次見完佢地都深深佩服佢地，兩老得閒喺屋企就會整蛋糕，同d花盆換花泥，魚缸又換換水，又搓下包包食，每日晨運之餘仲會打打羽毛球及游水；簡簡單單既生活，從來冇喺佢地口中出過怨言，我更加未見老爺發脾氣及罵人，這樣簡單而快樂既人生很不錯呢！

下個月老爺八十歲生日了，希望佢同奶奶都繼續身體健康強壯，開心快樂！

暑假安排

                   

暑假話咁快就開始了，每年我都會好頭痛報d咩活動俾囡囡玩，最好又平又好玩啦！

今年升六年班了又要應付呈分試，好唔好去補習社補下呢？未唸掂，報咗打羽毛球郁下身先啦，前幾日同囡囡去游水，見佢已學了兩年既自由式仍然未係好得，姿勢仍然麻麻，一於轉一轉教練，試下參加d泳班學多一次，不過就揀咗2：30-4pm呢段時間，會唔會曬c呢可？我仲唸緊我自己要唔要自費入場吼實佢游呢，話哂安全d嘛，不過如果有我在場又可能影響佢既狀態喎，真係難唸呀，阿媽唔易做呀，出$又出力！
暫時都係決定暑期玩樂休息為主先啦，可能買d補充在家嘆冷氣自己做練習算了！（其實係我懶得熱辣辣出去管接管送咋）

好人難做

 

今日既天氣真係好熱好焗，我呢輪好怕好怕熱，不過今日最甘，因為去了囡囡學校做義工帶隊去挪亞方舟曬足一日，仲要冇帶墨超冇㡌冇防曬，c未！

囡囡d同學都好鍾意黏實我，不過結果就慘了，囡囡勁食醋，喊哂話驚d同學搶走佢媽咪，叫我唔好再去學校做義工喎！激氣呀，熱到c為了個女去做義工佢竟然嬲哂回家後仲勁喊，唉，真係愛你愛得好辛苦呀，點解你竟然會懷疑我對你既愛㗎儍女！

高d~高d~再高d呀))))))

                   

呢幾日又是發癲高峰期, 因為囡囡p.5呈分試進行中, 佢一貫的表面極hea, 我又撞啱頭痛, 胃痛+想想地開始感冒, 天氣極濕又熱, 可能我肥, 一郁便一身大汗好似開了水喉地出汗停唔到, 但又冇可能唔出街, 每朝一去到學校我已極度辛苦了(因為冇車搭要行20分鐘路程)!

當然我知亞女壓力都好大, 佢用張被蓋住自己話想匿埋唔考試喎, 唉~~~~~, 我已經上星期五晚同佢出tst睇鴨鴨, 星期六去書店睇一陣書, 夜晚溫完書可以睇tv; 星期日又同佢出街食早餐行一陣先回家溫書, 仲想點~~~, 仲有兩日捱呀))))))))))), 兩母女發哂癲, 好在老公仲頂得住, 不停勸我只要付出不要望回報了, 佢EQ真係高我好多, 希望佢一路EQ都咁高,亦希望我自己既EQ高d高d再高d啦~

合時

                   

尋日(22-5-2013)黑雨所以學校停課一日, 原來唔單止學生連我都好開心呀, 可以好好地休息番一日, 唔洗煮早飯唔洗湊返學放學, 又唔洗買餸, 全日都冇落街呀, 好感恩呢日假期來得正合時!THANKS GOD!

人際關係

                   

人際關係呢樣野我不嬲都弱項，都唔鍾意social既，更加唔識教阿女點處理！學校好似一個小社會，細細個已經有人想做大家姐，有人適睇風頭火細，阿女純品性格遇到唔識珍惜佢既朋友仔好hurt呀，一心一意做完功課捱夜穿條手鍊仔被好朋友做生日禮物，仲做埋包裝寫得靚靚加埋貼紙，小心奕奕怕整汚！哼，俾完朋友仔換到既說話係：＂我鍾意個貼紙多過份禮物囉！＂激c囡囡呀！佢心裡面總覺得自己唔夠好，冇人幫佢冇人鍾意同佢玩冇人撐佢，唉，呢d野可以點樣幫佢點樣教佢呢，無論我幾鍾意佢幾錫佢，總不能帶我返學陪佢撐佢架，見佢講既時候喊得好犀利我真係心都赤埋呀！