上帝早已預備

我又揾到了一份兼職呀，不過下星期一先返工，希望今次不是體力勞動既工可以應付到啦！只需要做三星期（只做11月）便可以，非常感恩啱哂我要求呀（因為12月阿女考試呀），＄當然唔多啦，希望今次可以搵番小小自信啦！

莫非呢份真係「上帝早已預備」俾我既工，感恩感恩！thanks God!

矛盾

好多時都發覺自己好矛盾，我份人比較被動及慢熱所以好少會主動打電話俾人或約人去街！

最近一個已移居海外的中學同學因要回港奔喪所以便相約出來一敘，其實我又想出去但又怕應酬，因為自己係一個冇返工既師奶仔，佢地個個事業型又經常出差，我覺得自己會冇話題傾囉！但我又成日唸自己又唔會搵人，如果人揾你你又唔去，咁我又真係會變成孤獨精架喎，又想A又想B，我份人真係矛盾架！

一點甜

我平日對甜食麻麻地，不好甜品糖水之類！今日卻突然好想食栗子蛋糕，好想食d甜野，小小願望又能力範圍許可，一於滿足一己私欲，食完大滿足！

有時～給自己生活中的一點甜，能讓自己走得更遠！

江山易改，品性難移

以為自己呢幾個月思想有改善，原來我唸野一直冇改變過，仍然咁負面！

話說尋日約了媽咪同舅父去食午餐，不過只約了早上大慨時間未約實既，我唸媽咪大概十點返完教會我十點半去搵佢咪啱囉，舅父又whatsapp我佢要十二點先到（但我已on the way)! 一直打俾媽咪都冇人接聽，唯有同囡囡呆在吉野家食下野坐住等啦，一直打電話俾媽咪，直至十一點八先揾到佢，我個心急到CC下，極度擔心，會不會暈咗冇人知？點解佢明知我會揾佢都冇哂影？究竟發生咩事呢？全部在我腦中都係負面思想！唉，最後佢竟然話電話按了震機，之後又話差緊電，究竟知唔知我好擔心佢架！

為食貓

呢幾日好熱呀，一早湊完返學一身大汗去食份早餐嘆杯凍啡先去買餸！

我份人好怕悶所以唔可以日日去同一個街市，所以我搭車去了他區既街市濕平，買得好開心好滿足呀！有人落足咀頭叫我買糭，本來冇打算買，後來又心軟了，一於一隻紅豆一隻綠豆啦，十五蚊一隻，盛惠三十大元啦，好在又幾好味喎yummy，拿拿淋冲番杯普洱消下滯先得！

食咗半隻先記得影相！

平靜

呢幾日食咗藥個人心情平靜咗，不過成日都好眼瞓，但的確火氣冇咁猛，自己都覺得自己和善咗呀，希望遲d唔靠藥物都可以咁冇火啦！

情緒

今日睇咗醫生喇，在醫生度量血壓更高，下壓9X上壓更去到167，不過醫生話可暫不吃藥觀察兩星期及寫下紀錄的度數俾佢睇再決定！

但另一方面要食兩星期控制情緒藥，因為我又失控了，在醫生房內又流馬尿了，希望這次d藥可令自己鬆一鬆吧！不過我冇話俾媽咪知我食呢d藥呀，因為我今早才陪佢去做白內障手術，我不想佢擔心呢，而且佢尋日仲生日添，只希望佢可以開心生活，身體健康已很滿足了！

血壓

呢排情緒成日起伏好大，好容易激動，俾阿女激一激，一下子就出現火滾情形！突然心血來潮用個血壓計check下，嚇c我了！以往我的下壓是6x上壓120-130左右，呢次係上壓130下壓98呀，試過好多次，下壓都係過90；唉，我唔想成世要食藥呀！）））

荒漠甘泉

尋日（22-2-2014）去粉嶺探姑婆（好少去）竟然在鬧市發現呢個建築物----粉嶺聖約瑟堂，好似世外桃源咁靚，最衰唔近我屋企啦，不過影低分享下都好吖！

不自量力

近期總想吃些辣既野，膽粗粗買了這樽蝦米朝天辣椒，煮了碗粉加一少匙試下先，辣c人喇，原來我都幾唔食得辣，可能辛辣麺已是極限了！

突破

11-2-2014 （tue) 

今日我嘗試了人生第一次自己入戲院睇戲，之前從未唸過既，可能有d野就係需要這一下的勇氣，不是特別想睇呢套，只是想迫自己一d轉變及調整一下心態啫！

尋求良方

呢輪我真係覺得好累好累好累呀，睡眠質數唔好，一早起身對眼都係好累了，撐到中午已經累到好似冇哂電咁，但仲有大半日要捱，好不容易頂到十點幾一定要瞓了，不過又瞓唔淋，轉來𨍭去發下夢已天光了，不，天未光，我多數比鬧鐘還要早起來！究竟食d咩可以令自己精神d呀，我想多d時間用呀，我要多d體力睇電視睇書同做家務呀！

病態購物狂

新一年了，仍然覺得自己個人好燥好緊，日日都買一大堆野發洩，不過都只是局限在超市和街市，又瞓得唔好發惡夢了，連續四五晚的惡夢，真可惡呀！可能新年快到了，我愛自閉但新年要見人冇得收埋自己了！

What's wrong?

原來新一年未寫過blog, 今日開齋先！

我好怕收禮物又好怕送禮物俾人架，因為我自小已知道人家送禮物俾你，無論喜歡與否都要欣然接受及多謝對方！但我自己往往都是碰壁的，送禮物仔俾人，換來的反應是：我都唔用呢d既，我都唔鍾意呢個卡通人物.........聽完真係唔開心呀！

早陣子聖誕節（12-2013), 行公司見到寵物寶石既手袋仔同銀包仔都幾靚，二話不說肉赤都買了，唸住一個俾囡囡一個送俾表妹仔一定好開心啫！

點知，囡囡係好開心呀，但，表妹仔既答案係：我最唔鍾意呢個卡通人物既。我O哂咀，冇言呀！咁我唯有即刻話：咁你唔鍾意俾番我啦，我好鍾意架；之後CC地氣收番d禮物入手袋！感覺真係嬲嬲地之餘仲問自己： what's wrong? 究竟點解會咁架，我收人禮物時明明知道人地送野俾我不是應份的，是有我心，應存感激之心架！所以如果我收完人地禮物又唔知回咩禮俾人時就頭痛了！

2013》》》》2014

2013快將完結了，究竟呢年我做過d咩呢？記性愈來愈差好多野都唔記得，希望新一年一切愈來愈好，正能量增加，怨氣減少，願能幫助更加多既人，生活更積極不要再虛渡光陰！