福大命大

本來去惠州三日都幾好玩，不過發生了一段小插曲呢！

在惠州梅菜街shopping時，在一間舗睇精品時突然從樓上二樓跌下一個不繡鋼保溫瓶在我頭上，不偏不倚中正頭奨，幸好沒有穿頭只是少少頭痛咋，否則後果不堪設想呀！今次真係福大命大呀！God bless me!

PS # 幅鸚母相片係囡囡影架，我覺得影得好靚呀，對鸚母是放在酒店門口的，在雀籠內都可影得咁好，叻女！

惠州三天遊（龍門尚天然溫泉＋喜來登渡假洒店）

今年奶奶話唔攪做冬食飯喎，佢要返鄉下，既然係咁我地便報團在22/12去玩3日了！

上星期去了大陸㓎溫泉，玩了3日，近期好少去咁多日，不過冇期待之下，又有d驚喜喎，環境比想像中亁淨，房間內暖氣非常正！而且酒店外貎係客家人土樓形式既客家圍酒店，幾特別！

好多人在曬魚乾，臘腸同臘肉呀，場面壯觀呀！

仲有一個小禮堂俾新人行禮！

DIY

囡囡考完試了，今日放學立即開工整薑餅屋慶祝聖誕節，之前在citysuper買既玩意，有得玩有得食！原來一d都唔易整，見佢埋頭苦幹了幾個鐘，終於完成了，靚唔靚其次，最緊要好玩！

有口福

雖然我暫時冇得去日本旅行，不過舅父剛剛去完日本回來，帶了一隻毛蟹回來送給我們這一家，好鮮味好滿足呀！

開心

12月了，份兼職亦完了，做咗9日賺了少少＄好開心，心情都好好！在灣仔返工，呢區真係好多好多人，見到地鉄站d人多到呢，嚇到我只敢搭巴士，不過預既時間起碼要個半至兩個鐘頭，返9點要搭7：30車，放工6點要成7：45-8:00先返到屋企呀，不過我只做兼職不是長工所以冇所謂啦！希望之後都會搵到呢d工啦！

21-11-2014

休息咗四日又叫我返咗兩日（星期三丶四），今日又停工了，心情開始接受了，始終都只是做埋下星期而已！返工最大好處是制止了我的購物慾，始終冇時間嘛；不過一放假就買番餐飽，賺咗d＄都買凸呀，但最緊要買得開心嘛！

14-11-2014（Day 5)

正當我工作上開始已適應時，又通知我暫停一下不用返工了，原因係做得太快暫時唔需要兼職了！

噢，真係唔知高效率原來不是好事，咁唯有抖下先，要努力按低我心中團火先得，返工返得咁起勁咁開心竟然突然被剎車叫停，希望心情不要失落太久吧！

10-11-2014（Day 1)

第一日返兼職，工作量不少，放工後好累，但感恩人事方面不錯，身體上的疲累可慢慢適應，仍然有興趣及能力繼續返工，加油努力，一定可應付得來的！

上帝早已預備

我又揾到了一份兼職呀，不過下星期一先返工，希望今次不是體力勞動既工可以應付到啦！只需要做三星期（只做11月）便可以，非常感恩啱哂我要求呀（因為12月阿女考試呀），＄當然唔多啦，希望今次可以搵番小小自信啦！

莫非呢份真係「上帝早已預備」俾我既工，感恩感恩！thanks God!

希望永存

當生命的擔子過於沈重之時，以新希望驅走黑暗，幫助我們超越絕望。祂會像光明驅散圍繞在我們身邊的烏雲。我們的上帝是希望的主！

Job

我呢輪突然好想好想返工，好羨慕人地有工返呀！

前幾日13/10/2014（星期一）我去了試一份我從來未做過既工，是最低工資的，不過我鍾意佢時間短學校假期，可惜我冇本事做呀（原來係一份要勞力既工），只做了一日咁多啦，後遺症係而家仲周身骨痛緊呀！

本來想做d野增加d自信心俾自己，點知做完仲down，連最低工資都冇本事去賺！

離群

最近一星期社會氣氛都差，佔中反佔中學聯大學生，周圍充斥着不愉快的氣氛，電台電視社交網站都講呢d，令人情緒好差，不期然令我都好唔開心！

咋晚囡囡曾就讀的幼稚園有一個升中重聚日的活動，邀請所有當年一齊畢業既幼稚園同學及家長出席聚會，我一向怕呢d聚會，不過囡囡又好想參加喎，咁我呢個阿媽唯有頂硬上陪佢一齊出席啦！囡囡同一個當年幼稚園唔同班但小學又一齊讀既同學一同作伴，可憐我又孤零零的一個，見番當年既同學仔同家長我都少少開心既，不過囡囡反而同自己班既同學零交流，所以我都顯得格格不入自己坐埋一邊，好不容易捱了兩個半小時以為甩難可以散會了，但臨走時一位家長滿腔熱情叫她囡囡及我女一齊影相，之後問我攞電話號碼當晚還把我加入了群組呢，0h my God，最怕應酬的我又立刻變得情緒不安了，可能我同呢班家長唔啱咀形啦，我覺得一齊時冇共同話題好辛苦呢，退出群組又好似不太好，唯有一路唔回應啦，唉，點解我好似好難合群咁既，總是在不適合的人群中穿插，總是難碰到啱key既人！

中一學校生活點滴

暫時返咗三個星期學，囡囡都算適應得唔錯，對呢間中學開始有歸屬感了，參加了很多活動（女童軍，田徑，話劇組，英詩朗誦，敲擊樂），返學時間比以前長了，因為課後常有活動，朝早7點多出門口晚上6點回家，同大人返工一樣，不過晚上仍要做功課；但比起小學已舒服得多了！

小時候我好憎返學架，因為返完學已經好累，但夜晚仲要做功課！所以我成日同媽咪講想快d出嚟做工，因為放工後便自由了不用再做功課或其它野，可能我係大懶蟲掛，所以囡囡叻過我好多呀！

😊😊😊😊😕😕😕😕😄😄😄😄

P.S. 

不過有d小插曲，阿女既飯腳同學仔病咗冇人同佢食飯呀，佢要一個人食孤獨午餐好唔開心喎，咁我一於去陪佢食番一日冧下佢啦！可能我係孤獨精掛，我又唔怕一個人食野喎！

開心夜

終於昨晚出去和舊同學聚會了，氣氛好好，有人仲帶來學校既班照來認人，有說有笑十分開心呢！不過阿女就唔開心了，成晚掛住媽咪仲俾爸爸整喊添！

尋晚我地去了又一城的八月花食飯，又估唔到佢d甜品做得咁出色喎，仲唔貴添！

空巢期

囡囡返中學已一星期多了，暫時算適應得不錯吧，但佢仍然體力欠佳，始乎每日都疲憊不堪，暫時迫佢飲雞精幫手先，希望遲d會好d！

佢開始自己返學放學了，不過要轉兩次車時間仲未預得咁好，功課方面我都管不了，因為冇手冊寫功課又不是明天交所以幫不了忙！是時候我要開始學習放手了，不過我先要好好整頓自己既生活先，因為我要重新適應這空巢期，不容易呢！

矛盾

好多時都發覺自己好矛盾，我份人比較被動及慢熱所以好少會主動打電話俾人或約人去街！

最近一個已移居海外的中學同學因要回港奔喪所以便相約出來一敘，其實我又想出去但又怕應酬，因為自己係一個冇返工既師奶仔，佢地個個事業型又經常出差，我覺得自己會冇話題傾囉！但我又成日唸自己又唔會搵人，如果人揾你你又唔去，咁我又真係會變成孤獨精架喎，又想A又想B，我份人真係矛盾架！

新的開始

明天九月一日囡囡開始返中學了，新的開始希望佢有開開心心既六年學習生涯！

最後衝刺

暑假完結前去了兩天廣州玩，其實只不過去住一晚酒店吧！不過這次陣容好強大呀，親戚團共32人，包團出發呀！

最特別係參觀了廣州博物館及百萬葵園，而且今次住呢間酒店好特別，係一間商務酒店，第一次接待旅行團呢！

百萬葵園，呢d全部都係鮮花黎架！

暑假完了

暑假眨下眼剩番一星期咋，好好玩埋佢喇，上星期五去了大埔捉蟹仔同捉魚，好多人掘硯呀！臨走時見到人地堆既石仔示愛，幾靚噃，即刻影低先！