磁力共振

大約7年前媽咪試過軽微中風，腦有兩條血管塞了，不過冇咩大礙(因為發現得早）！呢輪佢又覚得有d唔妥，睇咗腦科醫生，安排今日照磁力共振，我而家陪佢照緊，星期一（30/6/2014）才有報告，到時見醫生睇報告，希望冇事啦！

媽咪，妳一定要長命百歲呀！

一點甜

我平日對甜食麻麻地，不好甜品糖水之類！今日卻突然好想食栗子蛋糕，好想食d甜野，小小願望又能力範圍許可，一於滿足一己私欲，食完大滿足！

有時～給自己生活中的一點甜，能讓自己走得更遠！

前世情人

老公已經做咗11年父親，佢當然好開心啦，阿女今年父親節親手做咗一個斑蘭蛋糕送俾佢，囗又甜心更甜啦，囡囡果然係爸爸既前世情人！

江山易改，品性難移

以為自己呢幾個月思想有改善，原來我唸野一直冇改變過，仍然咁負面！

話說尋日約了媽咪同舅父去食午餐，不過只約了早上大慨時間未約實既，我唸媽咪大概十點返完教會我十點半去搵佢咪啱囉，舅父又whatsapp我佢要十二點先到（但我已on the way)! 一直打俾媽咪都冇人接聽，唯有同囡囡呆在吉野家食下野坐住等啦，一直打電話俾媽咪，直至十一點八先揾到佢，我個心急到CC下，極度擔心，會不會暈咗冇人知？點解佢明知我會揾佢都冇哂影？究竟發生咩事呢？全部在我腦中都係負面思想！唉，最後佢竟然話電話按了震機，之後又話差緊電，究竟知唔知我好擔心佢架！

佳句

網絡上看到的圖片很有意思，特別留下用來提醒自己！

相處方式

人同人既相處的確好奇怪好玄妙！有血緣関係唔代表一定相處得好，只代表一定要見面啫，可能一d冇咩関係既朋友大家更懂客客氣氣互相尊重！

五月份既母親節姑仔約我地回夫家食飯慶祝母親節，我一心以為當然係買野食回去一齊食啦，其實嗰日阿女一早都要回校補課，咁我地五點先到奶奶家再看情況買咩一齊食啦！原來奶奶都唔知咩事，冇人通知佢慶祝母親節，佢仲煲哂湯準備去煮飯添，姑仔當然仲未見影啦，奶奶嬲到爆呀！我同老公叫佢唔好煮飯了，我地落街買野返嚟食同飲湯啦！當我地買哂蛋糕野食回來時，姑仔已到達了，奶奶塊面黑過隻鑊呀！其實我都唔明---唔通姑仔唸住母親節仲叫奶奶煮飯俾我地食？莫名其妙呀！

剛過去的端午節奶奶約大家星期日回家做節，佢唸住約星期日方便我地，因為星期一係假期！去到奶奶家先知姑仔一家都唔會出現，佢話因為佢個女星期四要考試喎，@@, 下星期四考試前五日都要食飯ga？咁都得！

其實姑仔個人好醒目圓滑，朋友多到不得了深得朋友喜愛，但偏偏同奶奶老爺就.......唔明、唔明呀！