湊熱鬧

                   

尋日囡囡早起身(9點), 佢平時瞓到10點先起身架, 巡BLOG時見個個都去書展(其實我好怕逼所以從來未去過書展), 好啦LAST DAY呢日同囡囡去見識下啦, 橫掂囡囡咁鐘意睇書(只要放佢入圖書館或書店, 可以睇幾個鐘頭書閒閒地架)!

C啦!由灣仔MTR已開始排隊, 行到一半已進退兩難, 唯有跟大隊慢慢逼啦, 去到中環廣場唸住都就快到喇, 點知.........吓要再轉圈行番落街再行番正門先可以入去, 唔係化咁大件樹! 幸好, 突然一個職員話有小朋友同老人家同行可行特快通道喎, 拿拿淋跟住行啦, yeah! 話咁快去到門口買票入場了!

11:35am開始行估唔到4:00pm囡囡都唔捨得走, 不過太肚餓啦又腳累, 本來在場內已買了一個烏冬頂肚, 但太難食了, 又涷冰冰d汁又酸, 囡囡都寧願拿拿淋走番出去食野算了! 收穫不是太多都ok啦, 我買咗一本書50%off, 原本$30而家$15, 囡囡買了3本公主書(原價$25, 內有d公主card少咗, 現買$2一本), 另又買了木棉樹系列既書(原價$32左右一本, 而家$100/4本), 都唔輕呀!
之後我地去食番個tea, 再搭船去tst行一陣街再搭車回家了; 老公都放工喇, 佢約我地食埋dinner先回家, 不過我同囡囡都好累了唔想出去食, 唸住返到屋企先算啦; 點知一開門, 老公已開哂冷氣煮好哂飯了, 好溫馨呀! 雖然唔係咩好餸, 只是斬料(燒排骨--囡囡至愛), 買既煎釀三寶, 灼唐生菜及白飯一煲, 但比起出街食c服得多呀!

今日節目都幾好, 久不久同囡囡拍下拖都唔錯既!

黑雨之下

         

昨日約了朋友出去太子飲下午茶(朋友突登攞d手信俾我呀, 佢返福州鄉下, d親戚親手做咗d線麵俾佢, 佢就攞俾我呢個"為食貓"試下囉---物輕情義重呀), 兩點左右同囡囡便去到酒樓, 我地一路傾一路食四點飲完便行下商場啦, 一望出去-----不得了啦狂風暴雨呀, 唯有再行下先啦, 轉頭望下玻璃窗出面仲係咁大雨, 點算好? 啱啱有間shop賣電視機, 一望之下原來黑雨, 點走呀? 好啦好啦唯有同朋友一家食埋dinner啦, 又去番下午茶既酒樓, 今餐食火鍋啦, d野食又唔錯噃! 之後老公放工再會合我地一齊食hotpot啦, 真係幾難得咁熱鬧呀!

(不過最開心都係朋友個囡囡呀, 昨晚本來要返學補英文, 不過佢好唔想返學, 極力"埃"佢媽媽放佢一馬唔返一晚學都唔得逞; 哈, 點知個天都幫佢, 黑雨之下宣佈停課, 開心到佢吖!)

自己嘆番晚

                   

昨晚約咗人dinner, 呢個係我同學, 又曾經係我同事, 已經識咗佢二十幾年了!

昨日係佢生日, 佢雖然大過我但仍小姑獨處, 父母又已經唔o係到, 所以年年我都會正日同佢慶祝既, 不過始終我有家庭有小朋友d時間比較難攪, 年年呢日都同老公請假一晚, 之前就可放低囡囡一晚俾人湊, 不過呢一兩年佢已經唔肯了, 所以都變成了3人晚宴, 不過囡囡昨日發燒我當然唔同佢出去啦!

所以老公放工立即回家, 我將囡囡交低後再飛奔出去應約, 出到旺角一刻勁大雨呀(幸好只灑了一下咋), 昨晚我地食hot pot, 一路食一路傾, 好耐冇試過咁free了, 竟然食咗4個幾鐘頭呀, 囡囡不停call我才飛跑回家!

可憐既囡囡好眼瞓但仍堅持等我番屋企先瞓, 真係心甜! (老公都冇佢咁痴心呀, 真係窩心呀!)

想瞓晏D都唔得

                   

囡囡昨日LAST一日返學校, 回校攞成績表同買書, 見佢成績都幾好回家換衫後就同佢去睇"史力加"啦, 再之後約婆婆食LUNCH, 回家後大家都疲倦不堪, 可能天氣實在太熱啦!

唸住今日開始唔使番學可以瞓晏D啦, 點知半夜摸下囡囡------發哂滾發燒呀, 做亞媽既呢D情況之下當然冇覺好瞓啦, 希望佢快D冇咩事啦!

超累超熱超開心

2010年7月9日下午5:29朋友累積瀏覽 0 9

今日好忙呀, 湊完囡囡返學回家已8:30am, 洗落d衫休息一陣10:00am又出發去學校睇結業禮, 之後又親子活動日, 攪到成4:00pm先回家呀, 真係好累好累仲好熱好熱!

有結果啦, 囡囡全班第一, 全級應該係第六呀, 不過最高興都唔係呢d, 最surprise既係囡囡今年攞到獎學金呀, 完全意料之外, 其實成績好之外仲要咩條件先攞到我真係唔知呀, 不過無論如何真係好開心呀!

明天結業禮了

                  

今朝又俾內地人家長捉住, 因為明天學校結業禮, 如果全級頭10名都可上台攞cert, 佢打俾老師知道佢囝囝全級第9名, 所以攞咗半日假去睇! 不過佢不斷問我囡囡係咪全級第一, 我話點知啫, 我又冇打去問, 不過我覺得幾多都冇所謂啦(講真的), 因為試卷已派了回來, 成績又已經知道了, 我唸10名內就ok既, 如果頭幾名壓力好大架, 之後次次都會俾人問, 連d不太友善既親戚都係咁, 次次見到囡囡都問係咪又考第一呀, 好討厭啫!(因為都唔係善意既!)

p.s. 不過都多得呢個家長既, 上年囡囡冇得上台好唔開心呀, 因為呢間學校比較關注成績唔好o個d同學, 經呢位家長同校長反映, 今年開始全級10名內都有cert可上台了!