919---------2010

                   

咁多位朋友既關心及愛護---恕我暫無能力可以逐一回覆, 由入醫院26/8/2010開始, 呢二十多日來既心力交瘁, 身心軀疲的日子暫告一段落了,  daddy在9月19日終於離開咗我地......., 而家我同細佬努力處理緊之後既安排, 不過我都好掛住妳地, 我希望一切settle好之後, 可以同之前一樣再回來同妳地傾計, 由衷的感激妳地既愛護同關心令我感到一份絲絲既暖意, 萬分感激!

........

                   

當daddy開始接受"葛量洪"醫院既環境夠安靜, 姑娘態度好nice既時候, 7/9(tue)又要轉返去東區醫院了, 今次要回去照"電腦掃瞄", 佢又要入住佢最唔like既隔離病房了(雖然好似私家病房一樣有獨立廁所, 電視機), 但孤獨既感覺令人好難受, 再入呢度令daddy既脾氣更壞! 照完"電腦掃瞄"令佢身體更差, 小便開始攪唔掂要用成人紙尿褲(尊嚴又一次受到打擊), 佢日日叫媽咪問姑娘幾時可調回"葛量洪"?

10-9-2010(fri)

不過情況不太理想, 10/9(fri)昨日湊女返學後便去娘家陪媽咪食早餐, 其間daddy打俾媽咪話前晚(mon)自己好"論盡", 因為自己又攪到一床都係尿, 媽咪話唔好介意啦手腳慢啫冇野既! 不久又收到電話醫生話報告出咗, 發現有肺炎, 約家人晚上6:00pm面談!

中午我同媽咪去探daddy, 佢氣喘嚴重咗好多呀, 檯附近仲有部心電圖機同血壓機, 佢話昨晚抖唔到氣call咗醫生, 我立即出房問當值護士昨晚咩情況, 原來昨晚佢抖唔到氣好嚴重call咗icu醫生急救, 而吸既氧氣由3度要加大至5度才ok, 佢話情況不樂觀----真係令人好難接受呀!

探完daddy我又要趕回學校去湊女放學了, 因為晚上6:00pm我來不到醫院見醫生, 所以打電話俾細佬叫佢放工趕來陪媽咪! 其實o係屋企我都一路好擔心, 8:15pm才打俾細佬問情況, 佢話落街先打俾我(咁應該消息都不太好啦!)結果係: 個肺好既機能得好少, 之前有肺結核菌, 而家又發現有肺炎, 肺氣腫及半邊肺有一個大黑影, 但要下星期一才可抽組織化驗才知黑影是否腫瘤,現只有打了一支針幫忙, 但支針要兩日才有效力, 呢一兩日好危險只可靠佢自己!  不過醫生亦講就算結果如何, 其實都係冇得醫, 生命倒數亦只可用"月"來計算, 我冇哂聲都唔知點回應好! 細佬話: 媽咪聽完已癲哂狂喊!細佬唔俾媽咪呢個樣見daddy, 所以推說媽咪感冒冇去醫院囉 !

過咗一陣daddy打俾我, 話叫我要好好照顧媽咪, 我已經........頂唔順喇! 平息好自己後, 打俾媽咪, 開頭講呢樣講o個樣都ok既, 但一提到daddy佢已失控了, 都唔知點算好, 我自己昨晚全晚都瞓唔到眼光光等天光呀!

終於轉院喇

                   

2/9星期四黃昏時份, daddy終於安排轉了去葛量洪醫院(黃"足"坑)了, 呢日媽咪就忙了, 一早我陪佢去旺角睇中醫, 再趕回柴灣拿食物去東區醫院探daddy, 三點daddy話會轉院不過唔知幾點到達, 我拿拿淋幫媽咪查"葛量洪醫院"既地址電話及探病時間同媽咪應該點樣去, 一連串上網打電話之後, 四點幾媽咪又來電話俾我, 佢話daddy打俾佢話: 好辛苦呀, 抖唔到氣呀, d人走開哂, 得我一個在救護車咋!", 媽咪當然好驚啦, 叫我即刻打去醫院叫護士落去睇睇佢喎, 媽咪即刻"飛的"過去啦! (而家囡囡返學我都係唯有電話幫媽咪手咋!)

煩悶

                   

而家daddy住既"葛量洪醫院"每日只有一次探病時間(晚上4-7pm), 都好既媽咪唔使去兩次咁辛苦, 不過就遠d, 要先去銅鑼灣再轉車囉!

其實而家最大既問題, 唔係佢既病情而係佢既態度, 佢成日"使人唔使本"囉(呢個"被使"既人當然係媽咪啦), 又叫媽咪攞呢樣俾佢又買o個樣俾佢, 拎到去醫院又話多又話少, 總之就諸多不滿啦, 最幣媽咪俾佢點到陀陀令呢, 媽咪身體又唔好!
昨日早上媽咪自己去覆診, 佢呢輪隻眼都好朦好累, 醫生話佢左眼有白內障要去專科, 下晏又要去照肺, 因為佢唔夠氣所以要照兩次先照到, daddy又打電話怪媽咪唔去探去(媽咪自己都好忙架)

不過老公話佢可能"老人家"病, 好似細路仔咁成日要引人注意唔想人忽視佢喎!

邊個辛苦d? (已更新)

                   

囡囡開學了-------所以我沒有去探望daddy了, 但媽咪仍日日如是拎食物及需要物品俾daddy, 我就每隔幾個鐘頭就打俾媽咪傾計!

今日daddy又喊了, 當然媽咪都喊埋一份啦, 日日咁攪法點掂呀? 媽咪話佢自己隻眼已狀態麻麻, 再成日喊就快睇唔到野啦!

唉------想點吖? 病人固然辛苦啦, 但都冇計架, 但其他既人俾你咁樣精神弱待都唔好過架, 點解以前咁堅強而家會咁頹咁懦弱架? (我要為呢段說話向daddy道歉, sorry! 我跟本冇資格話佢懦弱因為佢真係真係好辛苦!)

如果佢知自己第日要調去律敦治/葛亮洪, 仲要住多一輪醫院先得, 我唸佢脾氣仲差呀, 唯有我同細佬日日心理輔導媽咪啦!

抑鬱?

                 

昨日又如常走幾轉, 一早迫囡囡早起同佢去奶奶屋企, 自己再轉車過海再去醫院會合媽咪探daddy, 見星期日daddy情況好似好d胃口亦大咗少少, 媽咪唸住唔煮粥水了煲d飯等佢食肥d啦, 點知一去到佢已經坐係床到發緊脾氣, 又話d姑娘: 已經咁瘦仲日日抽2筒血好辛苦, d亞嬸態度又差想要$, 我地梗係唔出聲啦, 媽咪開飯佢食又唔like了: "我好憎見到d飯呀, d肉都好憎呀, 妳地成日要我食野, 食10碗飯好唔好, 要食得落先得格,!" 又話去唔到"大大"好辛苦, 我話你都冇咩食邊有得"柯"呀? 不過佢都話自己呢幾日脾氣唔好, 我見氣氛嘛嘛地, 我話落樓下7-11買西梅汁俾佢, 等自己出去抖抖氣!

轉頭再入病房睇佢, 佢又要媽咪幫佢洗牙(d假牙要拿出來俾水沖走d食物碎), 又要媽咪倒哂d食物唔要, 我望住媽咪覺得好可憐!(雖然媽咪一d都唔介意), 攪掂哂d野佢話好累, 我地o係度佢好安心想瞓一陣, 好啦我地協助佢蓋好被褥啦, 點知一瞓好在床佢又o係度喊, 佢喊媽咪又喊, 兩老都喊咁既情況我都唔知點好, 安慰一下平靜下來夠鐘我地就走了, 落到樓下走出醫院時, 媽咪話其實我落去買野時daddy又喊過, 唉點算呀! 唸唸下我驚佢抑鬱症睇唔開呀(又成日喊, 又話成日麻煩人地), 打電話上去俾nurse叫佢通知醫生留意下先!

下晝陪媽咪食野再回娘家幫佢攞d被套去乾洗及磅洗, 大家都疲憊不堪時, daddy又打俾媽咪話叫人幫佢放大便但唔成功, 不過褲子污穢了叫媽咪幫佢攞d新既到醫院, 本來昨日我唸住晚上唔探佢了( 因為囡囡都就快開學都要預備一下), 唯有再陪媽咪去多轉啦, 不過我冇入病房呀, 免得佢尶玠啦, 媽咪都唔太c服我陪佢食埋晚飯先自己回家啦! 老公就放工回奶奶家食飯再順便接女回家, 好累好累真係好累!

我都明白daddy住在病房好可憐, 眼唔好耳又唔好, 人又瘦日日俾人抽血驗呢樣驗o個樣, 自己一個俾isolate在房內個個wear口罩當佢生人勿近, 但有咩辦法啫, 佢在醫院有人睇住唔怕, 我唯有多d開解媽咪啦, 不過囡囡開學後返一星期半日我便走唔開了, 希望佢一日比一日好轉及有進步啦!

好擔心好擔心

                                           

星期四一早收到唔開心既消息, 我爸爸(即囡囡公公)入了醫院, 突然呼吸唔到call了白車, 細佬中午又要趕回公司, 我便拿拿淋換衫先坐車同囡囡去奶奶屋企安頓之後, 再飛的去東區醫院, 1:30去到在急症室等到2:30先上房, 再等醫生等到4:40先出現, 我冇食野企足幾個鐘, 醫生話要留院(要照肺, 抽血, 驗痰, 心電圖.....), 5:00pm我要抖抖了, 在男病房係冇女洗手間架, 我落樓下食d野(5:00先食我既lunch)順便去toilet, 5:30pm探病時間又入去陪佢, 一d好心但又好煩既親戚10幾人來探daddy, 我都覺得daddy好辛苦呀, 不斷去檢查, 想抖下又不斷有人來探, 又氣喘又要應酬佢地, 之後想去"大大", 但又一大班人在等佢"大大"之後同佢傾計(探病), 咁既環境點會有心情"出"吖, 點解d人咁唔識do架, 佢係病人泥架, 使唔使咁busy呀! 8點探病時間完畢, 老公放工後來接我, 我地再去奶奶家接囡囡回家!

尋日一樣我一早同囡囡去奶奶家再去同媽咪一齊, 我其實好累好累, 但唔緊要最緊要daddy冇事, 點解咁耐仲未有report架(已經兩日喇), 究竟醫生會唔會唔話俾家人知架!

daddy昨日情緒都好差, 可能昨日要轉去隔離病房(因痰內有肺結核菌), 之前我只在爺爺唔o係度見過一次daddy喊, 但昨日佢已喊了兩次, 呢輪媽咪又成日喊, 其實我自己都好眼淺, 但我要自己要支持住因唔可以影響佢地, 我呢兩日都靠祈禱希望神給我力量唔好喊, 好擔心好擔心!!!!!!