忘記過去, 努力面前

                   

眨下眼2010年又要過去了, 今年真係好唔開心呀, 最痛當然係失去爸爸啦, 我都估唔到自己到今時今日仍然未ok, 仍然晚晚唸起佢! 媽咪更加未ok, 要靠藥物去幫忙, 不過最吃力的是呢輪自己身體好差, 都唔知想點!

總之希望新一年一切都變得越來越好啦, 大家都要身體健康, 開開心心!

H a p p  y   N e w   Y e a r !

近況

                 

暫時呢排都打算日日去陪媽咪, 湊完女返學便"過對面海"娘家陪佢, 有時又同佢出去食下野咁啦, 不過其實都未必係我地陪佢架, 好似細佬咁, 有日放工回家突然狂喊(喊咗個幾鐘呀)嚇親媽咪呀, 不過因為返工時始終要抑制情緒, 佢都要俾自己既傷心釋放出來的!

而我自己前日湊完囡囡返學都突然失控在街上狂喊, 可能因為再前一日去取daddy既骨灰, 再去墳場攪手續睇地方, 抱住daddy既骨灰覺得好重不過心情仲沉重, 覺得好感觸個人好down, 所以又癲起上來, 慢慢啦呢d野始終要時間既, 不過可能我地一家人不嬲感情都好好, 而呢件事又太突然所以個個既情緒都好難平伏囉!

感恩的心

                  

終於送別了daddy的最後一程了, 一切都順順利利, 真的很感恩!

知道打風時真的很擔心(仲要話係強颱風), 因為好多老人家出席(教堂的教友), 所以好擔心落雨會影響佢地既安全!

今次daddy既後事我地係用天主教儀式, 氣氛比較平靜, 有詩歌班唱歌及有神父進行儀式, 不過我好冇用呀兩日都有喊, 同埋我不能接受佢變哂個樣呀! 細佬亦承受好大既心靈痛苦, 又要打點一切又要抑壓自己情緒, 所以有d儀式佢頂唔順時, 就唯有我去啦, 不過我真係好想疯狂發癲大喊呀, 當妳左邊右邊d人都大喊時妳叫我點抑制呀? 但又要主持大局, 不過幸好一切都有天父引領全都順利完成, 連囡囡都在全個過程中安安靜靜, 老爺奶奶都好俾面百無禁忌兩日都出席呀, 感謝主呀妳實在很眷顧我地一家人呀!

不過原來安慰人真係好難好難架, 媽咪一路都要靠醫生開藥才可控制情緒, 我擔心佢太依賴藥物叫佢盡量靠自己, 點知佢同我講靠唔到自己呀, 佢已經兩次睇唔開喇, 我同佢講我同細佬已經頂唔順了, 叫佢"當"為下我地兩個啦, 一切已咁順利唔好再咁樣啦, 我已經晚晚都瞓唔到捱唔住架喇! 暫時佢平穩了希望"明天會更好"啦!

仍然忐忑

                   

基本上我日日湊完女返學就會過海返娘家陪媽咪, 到夠鐘就回來湊放學同買餸, 在家就不停打電話俾媽咪傾計, 不過佢仍然好down好唔振作令人好擔心呀, 希望21/10之後所有儀式攪掂後, 佢心情可以平靜下來吧, 不過我地都好擔心21/10再一次剌激佢唔知會點呀!

至於我自己仍然瞓得唔好, 希望我都可以好好control下我自己啦, 至於囡囡我已同佢講公公已上了天堂, 不過佢都會間唔中眼紅紅話好掛住公公, 21/10當日都唔知囡囡會點tim呀?

919---------2010

                   

咁多位朋友既關心及愛護---恕我暫無能力可以逐一回覆, 由入醫院26/8/2010開始, 呢二十多日來既心力交瘁, 身心軀疲的日子暫告一段落了,  daddy在9月19日終於離開咗我地......., 而家我同細佬努力處理緊之後既安排, 不過我都好掛住妳地, 我希望一切settle好之後, 可以同之前一樣再回來同妳地傾計, 由衷的感激妳地既愛護同關心令我感到一份絲絲既暖意, 萬分感激!

........

                   

當daddy開始接受"葛量洪"醫院既環境夠安靜, 姑娘態度好nice既時候, 7/9(tue)又要轉返去東區醫院了, 今次要回去照"電腦掃瞄", 佢又要入住佢最唔like既隔離病房了(雖然好似私家病房一樣有獨立廁所, 電視機), 但孤獨既感覺令人好難受, 再入呢度令daddy既脾氣更壞! 照完"電腦掃瞄"令佢身體更差, 小便開始攪唔掂要用成人紙尿褲(尊嚴又一次受到打擊), 佢日日叫媽咪問姑娘幾時可調回"葛量洪"?

10-9-2010(fri)

不過情況不太理想, 10/9(fri)昨日湊女返學後便去娘家陪媽咪食早餐, 其間daddy打俾媽咪話前晚(mon)自己好"論盡", 因為自己又攪到一床都係尿, 媽咪話唔好介意啦手腳慢啫冇野既! 不久又收到電話醫生話報告出咗, 發現有肺炎, 約家人晚上6:00pm面談!

中午我同媽咪去探daddy, 佢氣喘嚴重咗好多呀, 檯附近仲有部心電圖機同血壓機, 佢話昨晚抖唔到氣call咗醫生, 我立即出房問當值護士昨晚咩情況, 原來昨晚佢抖唔到氣好嚴重call咗icu醫生急救, 而吸既氧氣由3度要加大至5度才ok, 佢話情況不樂觀----真係令人好難接受呀!

探完daddy我又要趕回學校去湊女放學了, 因為晚上6:00pm我來不到醫院見醫生, 所以打電話俾細佬叫佢放工趕來陪媽咪! 其實o係屋企我都一路好擔心, 8:15pm才打俾細佬問情況, 佢話落街先打俾我(咁應該消息都不太好啦!)結果係: 個肺好既機能得好少, 之前有肺結核菌, 而家又發現有肺炎, 肺氣腫及半邊肺有一個大黑影, 但要下星期一才可抽組織化驗才知黑影是否腫瘤,現只有打了一支針幫忙, 但支針要兩日才有效力, 呢一兩日好危險只可靠佢自己!  不過醫生亦講就算結果如何, 其實都係冇得醫, 生命倒數亦只可用"月"來計算, 我冇哂聲都唔知點回應好! 細佬話: 媽咪聽完已癲哂狂喊!細佬唔俾媽咪呢個樣見daddy, 所以推說媽咪感冒冇去醫院囉 !

過咗一陣daddy打俾我, 話叫我要好好照顧媽咪, 我已經........頂唔順喇! 平息好自己後, 打俾媽咪, 開頭講呢樣講o個樣都ok既, 但一提到daddy佢已失控了, 都唔知點算好, 我自己昨晚全晚都瞓唔到眼光光等天光呀!

終於轉院喇

                   

2/9星期四黃昏時份, daddy終於安排轉了去葛量洪醫院(黃"足"坑)了, 呢日媽咪就忙了, 一早我陪佢去旺角睇中醫, 再趕回柴灣拿食物去東區醫院探daddy, 三點daddy話會轉院不過唔知幾點到達, 我拿拿淋幫媽咪查"葛量洪醫院"既地址電話及探病時間同媽咪應該點樣去, 一連串上網打電話之後, 四點幾媽咪又來電話俾我, 佢話daddy打俾佢話: 好辛苦呀, 抖唔到氣呀, d人走開哂, 得我一個在救護車咋!", 媽咪當然好驚啦, 叫我即刻打去醫院叫護士落去睇睇佢喎, 媽咪即刻"飛的"過去啦! (而家囡囡返學我都係唯有電話幫媽咪手咋!)

煩悶

                   

而家daddy住既"葛量洪醫院"每日只有一次探病時間(晚上4-7pm), 都好既媽咪唔使去兩次咁辛苦, 不過就遠d, 要先去銅鑼灣再轉車囉!

其實而家最大既問題, 唔係佢既病情而係佢既態度, 佢成日"使人唔使本"囉(呢個"被使"既人當然係媽咪啦), 又叫媽咪攞呢樣俾佢又買o個樣俾佢, 拎到去醫院又話多又話少, 總之就諸多不滿啦, 最幣媽咪俾佢點到陀陀令呢, 媽咪身體又唔好!
昨日早上媽咪自己去覆診, 佢呢輪隻眼都好朦好累, 醫生話佢左眼有白內障要去專科, 下晏又要去照肺, 因為佢唔夠氣所以要照兩次先照到, daddy又打電話怪媽咪唔去探去(媽咪自己都好忙架)

不過老公話佢可能"老人家"病, 好似細路仔咁成日要引人注意唔想人忽視佢喎!

邊個辛苦d? (已更新)

                   

囡囡開學了-------所以我沒有去探望daddy了, 但媽咪仍日日如是拎食物及需要物品俾daddy, 我就每隔幾個鐘頭就打俾媽咪傾計!

今日daddy又喊了, 當然媽咪都喊埋一份啦, 日日咁攪法點掂呀? 媽咪話佢自己隻眼已狀態麻麻, 再成日喊就快睇唔到野啦!

唉------想點吖? 病人固然辛苦啦, 但都冇計架, 但其他既人俾你咁樣精神弱待都唔好過架, 點解以前咁堅強而家會咁頹咁懦弱架? (我要為呢段說話向daddy道歉, sorry! 我跟本冇資格話佢懦弱因為佢真係真係好辛苦!)

如果佢知自己第日要調去律敦治/葛亮洪, 仲要住多一輪醫院先得, 我唸佢脾氣仲差呀, 唯有我同細佬日日心理輔導媽咪啦!

好擔心好擔心

                                           

星期四一早收到唔開心既消息, 我爸爸(即囡囡公公)入了醫院, 突然呼吸唔到call了白車, 細佬中午又要趕回公司, 我便拿拿淋換衫先坐車同囡囡去奶奶屋企安頓之後, 再飛的去東區醫院, 1:30去到在急症室等到2:30先上房, 再等醫生等到4:40先出現, 我冇食野企足幾個鐘, 醫生話要留院(要照肺, 抽血, 驗痰, 心電圖.....), 5:00pm我要抖抖了, 在男病房係冇女洗手間架, 我落樓下食d野(5:00先食我既lunch)順便去toilet, 5:30pm探病時間又入去陪佢, 一d好心但又好煩既親戚10幾人來探daddy, 我都覺得daddy好辛苦呀, 不斷去檢查, 想抖下又不斷有人來探, 又氣喘又要應酬佢地, 之後想去"大大", 但又一大班人在等佢"大大"之後同佢傾計(探病), 咁既環境點會有心情"出"吖, 點解d人咁唔識do架, 佢係病人泥架, 使唔使咁busy呀! 8點探病時間完畢, 老公放工後來接我, 我地再去奶奶家接囡囡回家!

尋日一樣我一早同囡囡去奶奶家再去同媽咪一齊, 我其實好累好累, 但唔緊要最緊要daddy冇事, 點解咁耐仲未有report架(已經兩日喇), 究竟醫生會唔會唔話俾家人知架!

daddy昨日情緒都好差, 可能昨日要轉去隔離病房(因痰內有肺結核菌), 之前我只在爺爺唔o係度見過一次daddy喊, 但昨日佢已喊了兩次, 呢輪媽咪又成日喊, 其實我自己都好眼淺, 但我要自己要支持住因唔可以影響佢地, 我呢兩日都靠祈禱希望神給我力量唔好喊, 好擔心好擔心!!!!!!