人際關係

                   

人際關係呢樣野我不嬲都弱項，都唔鍾意social既，更加唔識教阿女點處理！學校好似一個小社會，細細個已經有人想做大家姐，有人適睇風頭火細，阿女純品性格遇到唔識珍惜佢既朋友仔好hurt呀，一心一意做完功課捱夜穿條手鍊仔被好朋友做生日禮物，仲做埋包裝寫得靚靚加埋貼紙，小心奕奕怕整汚！哼，俾完朋友仔換到既說話係：＂我鍾意個貼紙多過份禮物囉！＂激c囡囡呀！佢心裡面總覺得自己唔夠好，冇人幫佢冇人鍾意同佢玩冇人撐佢，唉，呢d野可以點樣幫佢點樣教佢呢，無論我幾鍾意佢幾錫佢，總不能帶我返學陪佢撐佢架，見佢講既時候喊得好犀利我真係心都赤埋呀！

近朱者赤, 近墨者黑

                                          

唔會想好勤力寫blog, 因為唔想又寫負面野, 不過要發洩負能量, 所以又做勞騷王了~煩請忍耐!

我既世界好細, 圈子好細, 朋友亦好少, 但潛意識有時又唔想自己咁, 我個人比較慢熱亦不主動, 但一熟絡後其實都ok健談架~, 不過我好容易受人影響, 好在細個我冇識到壞人啫! 而家每日送女回校後我總唔會同其他人去食早餐, 我寧願自己去食仲c服, 唔知係內向定孤獨精呢(可能唔啱傾掛)?

媽咪其實個人都好nice, 不過又係唔鍾意同其他人去social(不過又怕悶唔鍾意自己一個人o係屋企), 所以我有時真係覺得好大壓力呀, 一有假期便追問我有咩節目去邊? 我同
囡囡既節目佢又唔啱, 阿女好容易攪~可以去迪迪尼, 書局, 圖書館, 遊樂場, 溜冰........., 但媽咪呢d野都唔啱(佢眼唔夠精神睇書, 腳唔夠力行, 亦冇心機), 只最啱食野,飲茶, 行超市, 所以電話一到問我去食咩去邊到我便頭痛了~~~ 

聽日五一假期老公要返工, 媽咪又問我聽日點安排喇, 唉...........當然要睇阿女放學後幾多樣功課先講啦, 我又燥狂了, 事事唔順眼, 句句唔啱聽了! 真係好明白任何人都不可依賴別人, 要自己安排自己過得最合適既生活, 每人習慣不同呢!

講番容易受人影響, 我少同外界接觸(亦唔想接觸), blog及私人fb例外, 我接觸最多係老公, 囡囡同媽咪, 所以屋企既煩瑣事已好煩, 媽咪既負面情緒我不但冇本事去扶佢正面d, 基本上連我自己都被拉下來了!

矛盾

 

日日落雨心情超差呀, 囡囡呈分成績已派回來了, 結果是四個字~~~~強差人意!

我發覺自己將全個人既所有都FOCUS在屋企上, 所以總換來失望失望&失望, 點解我D思想會變成咁既, 對咩都冇哂興趣了, 點解有人會咁失敗既, 成日都好燥, 發完火又後悔, 每日都在矛盾中拉鋸, 賽後檢討係好事, but, 檢討完又歷史重演, 真係要好好唸下我之後條路要點行落去!

近況

最近心情好少少了, 不過骨子裡都是燥底的, 下星期一又開始呈分的第一擊~~~~考試了, 希望今次唔好發癲多D正能量啦!

表妹下星期四結婚了, 希望呢單喜事可以平衡下我D心理, 而且30/3(Sat)報了名同囡囡去愉景灣掘復活蛋, 本來都心大心細架, 因為唔計船票都要成$200報名費參加, 不過要抽籤於是搏一搏, 點知𠯢抽中咗就俾亞女去癲一次啦, 佢應該實會覺得好玩既!

愈緊張愈錫愈激心呀:((((((

2013年3月12日下午11:50朋友累積瀏覽 38 12

呢頭話錫佢多d嗰頭就俾佢激到扎扎跳呀，我估佢開始反叛期了(可能我都更年期了~極度燥底呀），句句都頂到行呀，唸野又負面(我唸我d負面思想灰色人生影響咗佢呀)，日日佢喊我又喊，真係人都癲呀！

其實我做亞媽真係好唔稱職呀, 我細個時咩活動都冇(媽咪冇同我去過公園, 游水, 踏單車, 冇參加過任何活動, 冇零用冇得自己出街, 其實我童年做過d咩呢?)所以我咩都唔識(唔識游水,唔識踏單車,更加唔識同人相處,唔識理財, 唔識處理情緒...................),  不過我已經好努力好努力去做好, 希望囡囡會開心d, 但好吃力好辛苦仍然吃力不討好, 以為自己湊可以對囡囡來說好好多, 但事與願違, 我辛苦佢都唔開心好辛苦, 咁我咁辛苦為咩呢?

心痛呢~

每日都好忙好累, 好多功課, 默書, .........., 沒完沒了, 亞女又瘦又唔夠瞓, 跟本唔夠體力應付朝6點半晚11既生活, 尋日仲連人帶書包一同跌了落樓梯, 幸好只是皮外傷，瘀及腫了少許，及書包爛了而已, 心痛呢! 唯有鍚佢多D多D再D多啦~

人性

                   

最近我仍然係無事忙，下個月又有一個表妹結婚呀，佢媽(即係我細姨)對我好好架，所以我會盡力幫忙佢地，包括心理輔導雖然我自己都唔叻！
呢個新年我見到太多人性了，認叻原來要包埋踐踏人ga, 不論男家女家都一樣, 我不嬲把嘴都唔叻所以多數做啞巴, 不過仍然會嬲會唔開心架！

點解要開解亞姨? 結婚本來係開心既, but一連串嘅問題來了，個男仔做咩行業架？有冇錢？屋企有咩人？有幾多金器？其實佢地已同居一輪啦又唔生bb, 不過因為要同父母及親戚交待啫! 呢個表妹唔叻唔靚, 不過好有義氣又唔貪心又抵得唸, 所以我同媽咪都幾錫佢架, 不過呢d一連串既問題便令姨仔好唔開心了, 更離譜是有d親戚更話亞姨應該點點點教女先得呀, 妳自己唔叻呀妳又唔識教呀, 點點點呀.........(其實佢自己都沒生有小孩的, 我覺得你又有咩資格去教訓人呢?)
(之前佢都有同我講類似說話啦, eg:我個女第日唔會叻呀, 因為佢父母都忠忠直直呀, 又唔滑頭唔識do.......之類呀!)
有d人又話要預多d位俾佢地坐呀唔好咁迫呀, 有兩個一兩歲的BB都要坐位置啊，仲要預埋兩個工人啊, 點解咁多煩人架！

其實我覺得佢地兩個鍾意又係正經人家結婚咪ok囉, 點解d人咁多事幹架, 總係憎人富貴厭人貧, 其實人地又冇問你賒又冇問你借, 你理得人咁多做咩啫? 好多好多呢d野都令亞姨極度唔開心, 人際關係真係好麻煩架!